Jóhanna, Steingrímur J og atvinnulífið!

Það er deginum ljósara að ekkert samfélag nær að blómstra án krafts og atorku einstaklinga og þess vegna verður að veita hugmyndum vinstri manna um ríkisvæðingu samfélagsins viðnám. Jóhanna og Steingrímur J eru fínir stjórnmálamenn og trú því sem þau standa fyrir en í alvöru spurt,  trúir því einhver að þau muni búa til frjósaman jarðveg fyrir íslenskt atvinnulíf - jarðveg þar sem spretta upp ný fyrirtæki sem blómstra ? 

Ekki ég og ég óttast að þeirra pólitísku viðhorf muni kæfa athafnakraft og áræði einstaklinganna, þeirra pólitísku viðhorf virka letjandi á einstaklinga til átaka og sóknar. Íslenskt samfélag má ekki við slíku, það verður að skapa á ný hvetjandi og heilbrigt umhverfi fyrir atvinnulífið, aðeins þannig munum við byggja upp og ná vopnum okkar á nýja leik.

Miklu skiptir í uppbyggingu samfélagsins að Íslandi endurvinni traust og trúverðugleika á alþjóðavettvangi og hingað vilji sækja erlendir fjárfestar  en hvað gera vinstri menn, hvernig birtist þeirra pólitíska sýn? Þeir leggja fram tillögur um að taka upp þegar gerða samninga, ætla sem sagt að breyta leikreglum eftir á og telja líklega að það sé leið til að endurvinna traust og trúverðuleika á alþjóðavettvangi.

Ég spyr enn og aftur trúir því virkilega einhver að Jóhanna og Steingrímur J muni búa til frjósaman jarðveg fyrir íslenskt atvinnulíf?

Athugasemdir

[Ægir Sævarsson (IP-tala skráð) 22.4.2009 kl. 11:12]

Ég skil samt ekki alveg stefnu ykkar í atvinnumálum. Þið viljið byggja upp atvinnulífið og skapa hér skilyrði fyrir framkvæmdagelið einstaklingsins og allt það. En þið farið gersamlega gegn öllum óskum allar hagsmunasamtaka atvinnulífsins (nema LÍÚ auðvitað) um að sækja um aðild að ESB? Þetta er ekki trúverðugur málflutningur - talandi um að skapa hér frjóan farveg en koma svo í veg fyrir eðlileg aþróun á samskiptum við Evrópu eins og allt atvinnulífið vill!

Ægir Sævarsson

[Sigurður Sigurðsson (IP-tala skráð) 22.4.2009 kl. 13:04]

Sæl Ragnheiður,

Hefur einhver hjá Sjálfstæðisflokkum rætt við AGS um þessa Evru lausn ykkar. Er þetta raunhæfur möguleiki og ef svo er væri hægt að fá staðfestingu á því frá AGS.

Hvernig eigum við sem stöndum í innflutning að sannfæra okkar birgja um að það sé í lagi að koma á eðlilegum reikningsviðskiptum og veita okkur þann greiðslufrest sem við höfðum áður.

Hvernig ætlar flokkurinn að styrkja gengi ÍSK fá stöðugleika í hagkerfið. 

Hvað mælir gegn því að fara í aðildarviðræður strax að því gefnu að EU hafi nokkurn áhuga á því. 

Sigurður Sigurðsson

[Guðmundur Pétursson, 22.4.2009 kl. 13:05]

Eins og svo oft áður, þá snýst þetta um að velja illskásta kostinn.  Þó svo að maður hafi ákveðnar efasemdir um SF og VG, þá er þetta líklega sú stjórn sem verður mynduð eftir kosningar.  Sjálfsæðisflokkurinn hefur ekki mikinn trúverðugleika, 2 fertuga lögfræðinga í forystu sem tala ekki um annað en álver, álver, og aftur álver.  Ég held að valið hljóti að standa á milli VG, SF.  Það hvort Sjálfstæðisflokkurinn verði með  14 eða 17 þingmenn í stjórnarandstöðu skiptir minna máli.

[Sverrir B (IP-tala skráð) 22.4.2009 kl. 14:10]

Maður hlýtur að spyrja á móti: Trúir því einhver í alvörunni að forysta Sjálfstæðisflokksins geti búið til frjósaman jarðveg fyrir íslenskt atvinnulíf?

Hér er allt ein brunarúst eftir þann flokk. Ósætti og illur andi yfir öllum helstu atvinnugreinum: orkumálum, iðnframleiðslu, sjávarútveg og fjármálastarfsemi. Sannkallað grettistak að knésetja heilu atvinnuvegina og æsa upp landsmenn gegn atvinnustarfsemi. Í ofanálag sveiflast og breytist stefnan í málefnum ESB og skattamálum dag frá degi.

Ekki sannfærandi og ekki æskilegt.

[Jóhannes (IP-tala skráð) 22.4.2009 kl. 14:15]

Ég hef kosið Sjálfstæðisflokkinn undanfarin ár vegna ýmissa þeirra gilda sem hann stendur fyrir umfram aðra flokka. Hef reyndar alltaf viljað aðildarviðræður við ESB til að fá upp á borðið hvað í boði væri og taka afstöðu í þjóðaratkvæðagreiðslu, og hef talið þetta eðlilega lýðræðislega kröfu. Nú hefur komið endanlega í ljós að íslenska krónan er ónothæf mynt til að mynda efnahagslegan stöðugleika og byggja upp kraftmikið atvinnulíf til framtíðar og jafnframt endurbyggja upp traust erlendis, og því eru Sjálfstæðismenn greinilega sammála.

Sjálfstæðisflokkurinn, sem yfirleitt hefur haft skýra stefnu og boðskap í efnahags- og atvinnumálum, er greinilega í mikilli klemmu við þær nýju aðstæður sem efnahagskreppan hefur skapað.  

Fjölmargir sjálfstæðismenn, ekki síst fyrirsvarsmenn og stjórnendur í atvinnulífinu, eru þeirrar skoðunar að grundvöllur að efnahagslegri viðspyrnu og endurreisn Íslands sé fólgin í inngöngu í ESB, ERM II samstarf og síðar upptöku Evru. 

Niðurstaða Landsfundar Sjálfstæðisflokksins í ESB málinu var hinsvegar með þeim hætti að þekktasti ESB andstæðingur flokksins, Styrmir Gunnarsson, lýsti yfir fullnaðarsigri á ESB sinnum innan flokksins. Það veganesti, leiddi líklega til þeirrar undarlegu tillögu að semja við ESB í pilsfaldi AGS um upptöku Evru án ESB aðildar, þrátt fyrir að fyrir lægi að þetta væri í andstöðu við alla fyrirsvarsmenn ESB sem spurðir hafa verið og yfirgnæfandi líkur á að þetta væri í besta falli illfær leið.

Sjálfstæðisflokkurinn hefur einfaldað ákvörðunina fyrir þá sjálfstæðismenn sem telja aðildarviðræður með það að markmiði að fá ESB aðild taka upp Evru mikilvægasta mál þessara kosninga:

Atkvæði greitt Sjálfstæðisflokknum = atkvæði gegn ESB aðild

Svo einfalt er það!

[Sverrir (IP-tala skráð) 22.4.2009 kl. 14:32]

Sæl Ragnheiður,

,,...að endurvinna traust og trúverðuleika á alþjóðavettvangi....Ég spyr enn og aftur trúir því virkilega einhver að Jóhanna og Steingrímur J muni búa til frjósaman jarðveg fyrir íslenskt atvinnulíf?"

Þetta er kjarni greinarinnar, endurvinna traust og trúnað á alþjóðavettvangi og byggja upp fyrir framtíðina.  Þið eruð með skýra stefnu að leyfa fólki alls ekki að vega og meta sjálft hvort það vilji stíga inn í alþjóðasamfélagið, með stöðugan lágvaxtagjaldmiðil að langtíma markmiði og annað traust sem því fylgir.  Að ekki sé nú minnst á þann frjósama jarðveg sem af því leiðir, fyrir okkar, sem og framtíðar kynslóðir þessa lands.  Ef hins vegar samningsviðræður leiða til neikvæðrar niðurstöðu, sem litlar líkur eru á, getur fólk hafnað slíkum samningi og þá er sú umræða að baki.

Þessi skrif þín hér segja ekki neitt, ekkert málefnalegt, bara hræðsluáróður ,,veistu hvað gerist ef vinstri menn .....ó ó ó (er Samfylkingin vinstri flokkur?)".  Þú ert ekki að segja neitt annað og satt best að segja hefði ég búist við mun beittari aðferð frá þér, einhverju bitastæðara.

Það er því hægt að gagnálykta út frá því sem þú segir og spyrja þig á móti;  trúir þú því Ragnheiður að hafna með öllu fyrirfram aðild að ESB án þess að hafa hugmynd um hvað er í boði, sé til þess fallið að auka traust alþjóðasamfélagsins á okkur?  Sé til þess fallið að tryggja hér langtíma stöðugleika?  Til þess fallið að skapa frjósaman jarðveg (sem við höfum reynslu af frá 1945 með hinni aðferðinni, ykkar aðferð, króna, vextir, gengisfall o. fl.)?  Telur þú það til þess fallið að við náum vopnum okkar að nýju?  Telur þú að okkur sé betur borgið utan samfélags þjóðanna, með tollmúra í stað án, án sameiginlegrar myntar, með höft í stað án, án fullkomlega sameiginlegs markaðar og að síðustu, án atkvæðaréttar til lagasetningar innan sambandsins eins og nú er, þó við séum að lang stærstum hluta nú þegar seld undir það regluverk fjórfrelsisins?

Svo talar þú um að ná vopnum að nýju og traust alþjóðasamfélagsins.

Ég spyr, trúir því einhver virkilega að Sj.flokkurinn (sem var hér í stjórn fyrir nokkrum vikum og hafði þetta allt í hendi sér en gerði ekki neitt) muni leiða þjóðina út úr þessum ógöngum og fyrirbyggja annað eins, með því að hafna því að skoða hvað er í boði hjá ESB?

Ég held að ekki einu sinni þú sjálf sért að trúa þessu Ragnheiður.

Takk fyrir.

Sverrir (flóttamaður úr S.flokknum ásamt þúsundum, vonandi tugþúsundum annarra)

[H Jónson (IP-tala skráð) 22.4.2009 kl. 17:57]

Þú varst ein af ástæðunum fyrir því að ég ætlaði að halda áfram að kjósa x-d. Nú fyrir stuttu kom í ljós að þú hefur verið á spena ( keypt ) af Baugi. Þú hneykslast á grímuklæddum ungmennum en á sama tíma og þú ert til sölu. Gerðu öllum okkur greiða og snúðu þér að öðru en að vinna fyrir okkur á þingi. Þú og þínir líkir eru m.a. ástæðan fyrir því hvernig er komið fyrir okkur.  Vík burt ! Við höfum annað að gera en að sinna spilltum farþega einsog þér. Kveðja.

[Pétur Maack (IP-tala skráð) 22.4.2009 kl. 20:26]

Það er gjarnan þrautalendingin þegar fólk er komið í algert þrot að ráðast á andstæðinginn. Hafi maður engar góðar hugmyndir sjálfur má þó alltaf rakka hugmyndir annarra niður.

Þessi pistill er þannig.

Þó það komi ekki fram í pistlinum virðist sem það eigi frekar að treysta sjálfstæðisflokknum fyrir endurreisn atvinnulífsins og því að endurvinna traust erlendis eins og þú orðar það.

Semsagt: Plan ykkar um endurreisn virðist byggja á sömu aðferðum og komu okkur í þá stöðu sem nú er uppi. Það er ekki sérlega trúverðugt.

Á meðan á þessu stendur gengur hræðsluáróðurinn út á úreltar staðalmyndir um vinstrimennsku, sorglegt! Fólk er hætt að kaupa þetta.